Ich schäm mi fascht was i wott verzelle aber jetzt mues es use, i has e so welle. Vor e paar Jahr hätts mi plötzli übernoh Ich ha mi welle lifte loh. Ihr wüssed jo, chum hesch als Frau die erschte Runzle, heisst’s grad die sig ein alti Pfunzle. Dänn bisch fruschtriert, machsch Crem und Salbi parat, üebsch jede Tag heimlich wieder de Spagat. Runzle bi de Manne, do heisst’s: Läck de isch super, de het en Charakterchopf wie de Gary Cooper. Was i scho alles undernoh ha, zum jugendlich z’blibe i chönnt en ganze Roman drüber schribe! Sit minere 3. Abmagerigskur hani scho weniger Buch, defür überall vorigi Huut, woni nieneme bruch. Drum bini gange in en Kurs für schön und schlank im 2. Stock vis à vis vo de Bank. Au! So vil Schminkzüg hani no nie gseh i mim Läbe, dä ganz Tisch voll Fabtöpf mit Pinsel denäbe. I ha denkt bis d’Lehreri chunt, chönt i efang probiere, und mis Gsicht sorgfältig es bitzeli ischmiere. Violet für d’Augebraue, das chönt sich lohne und d’Bäggli ganz liecht mit zinober betone. D’Augedeckel grüen und d’Lidschatte blau, mini Pinselfüehrig isch zwar no nöd genau. Aber es faht mer a gfalle, i chum richtig in Fahrt und mache grad en Pinsel voll oker parat, do chunnt d’Lehreri ine und macht es Gschrei: "Sie, de Schminkkurs isch näbedra, do isch Buuremalerei!" I ha die Farb fascht nümme abbracht, emel nöd so schnell 14 Tag bini umegloffe wie ne s’Mälchterli vo Appezell. Spöter hät mir e Gmüesfrau en Vorschlag gmacht:   "Legget Sie Gurkeschiibe ufs Gsicht über d’Nacht. Wüssed Sie, d’Gurke hend die Eigeschaft,  dass ihre Saft d’Gsichtshuut strafft." Das lüchtet mer i und i mache mir e Maske parat bis i usgseh wie ne Schüssle voll Gurkesalat. Am andere Tag, Ihr hättet mi sölle gseh i han überhaupt kei Chrähefüess meh! Aber s’Mul isch schräg und d’Nase verboge,  so hend mir Gurke s’Gsicht zäme zoge. D’Gmüesfrau het gseit: "Mammeli, Sie sind z’beduure! S’brucht frischi Gurke, nöd usem Gläsli die suure!!" Zum Glück hani gläse, wenn mer s’Gsicht well pflege, sig e Maske us Joghurt direkt en Säge. I bi grad in Konsum und studier vor mi hii weles Aroma wohl geignet wär für mi. Natürlich, hani denkt, Pfirsich muesch neh, denn das git sicher en samtige Teint. Dehei goni dra und schtrich me e Schicht Joghurt, samt Möckli Pfirsich is Gsicht. Dänn liggi here und schlof ufem Bett, ha nöd dra denkt, dass üsi Chatz Joghurt gern het. Woni verwached bi, hani dank ihrne Pfötli usgseh wienes Tartarbrötli. Per Zuefall hani denn en Versandkatalog gfunde und dert gläse uf Site 13, rechts unde es gäb schints eso en Stab zum Massiere, me brings Doppelkinni wäg, s’chönn gar nüd passiere. I ha grad eine bschtellt, sogar mit Heizig, i ha denkt das git de Huut es zuesätzlichi Reizig. Gli isch er cho, de Apparat - en enorme, mit Zuebehör, luter so komischi Forme. I setzen zäme und schalten grad ii, do zitteret de los und ich hindedrii. Ich hanen verwütscht und tue chrampfhaft probiere, mit dem wacklige Ding mis Chini z’massiere. Es het gar kei Wert, dass i drüber bricht, de Cheib goht überall, nur nöd im Gsicht. Z’letscht hani denkt, jetzt gosch under s’Messer und sueche d’Adresse vome Schönheitsprofesser. Ich finde inere Klinik z’Neueburg en Professer Zwingli, en prima Chirurg. Dä miech mit e paar Schnittli mit sim Skalpell e Miss Universum usere Bluetwurscht vom Bell. Das isch de Richtig, hani denkt, do muesch hi, de cha sicher au öppis tue für di. De Professer het mi weg de Falte zerscht für de Kabine-Vorhang ghalte. Denn isch er mit em Doppelmeter um mi umegschliche und het mi mit Fotene vo früener vergliche. Wüssed Ihr, was er gseit het das Trotteli? "Am beschte, Si verrissed Ihri alte Foteli." Aber denn het er gmässe und Runzle zellt und folgendi Diagnose gschtellt  "Also lifte chan i Si nöd, susch lueged hie müesst i d’Huut viil zwit ufezieh. De einzig Igriff, wo öppis chönnt gäh, i chönnt Ihne a de Füess de Saum umenäh... Jetzt blosed Ihr mir aber alli i d’Schue vom ganze Ufwand han i jetzt gnue. Jung chamer jo doch nöd ewig bliibe, drum versuech i, so wien i bi, s’Läbe z’vertriibe.Lömer doch üsi Runzle sii, si ghöred zu üs, wie zumene guete Esse de Wy.